Gunners’ Side – နောက်ဆုံးရ အာဆင်နယ် သတင်းများ (17Mar)

ပါတေးကို သီးသန့်ချီးကျူးသွားတဲ့ရှီးယားရား

လီဗာပူးလ်အသင်းကို ၀ – ၂ နဲ့ ရှုံးနိမ့်ခဲ့တဲ့ပွဲမှာ ပြသခဲ့တဲ့ ပါတေးရဲ့ စွမ်းဆောင်ရည်ကို  ကစားသမားဟောင်းကြီး အလန်ရှီးယားရားက အခုလိုပဲ သုံးသပ်ပြောဆိုလာခဲ့ပါတယ်။

“ သောမတ်စ်ပါတေးဟာ နောက်တန်းကစားသမား ၄ ယောက်ရဲ့ရှေ့မှာ တော်တော်အထင်ကြီးစရာကောင်းအောင်ကစားသွားနိုင်ခဲ့တာပါ။  သူက ဖြစ်လာသမျှတိုက်စစ်ကိုတားဆီးပြီး တဖက်အသင်းတိုက်စစ်မှုးတွေဆီမရောက်အောင်တားဆီးနိုင်သူပါ  “  ဆိုပြီး Premier League Productions အစီအစဥ်မှာပြောကြားခဲ့တာဖြစ်ပါတယ်။

အာဆင်နယ်ပိုကောင်းခဲ့တဲ့ အခိုက်အတန့်တွေကို ရောဘတ်ဆန်ပြောပြလာ

လီဗာပူးအသင်းနောက်ခံလူရောဘတ်ဆန်က   ပထမပိုင်းမှာ အာဆင်နယ်က ပိုကောင်းခဲ့ကြောင်း ဝန်ခံခဲ့ပြီး  ၊ လူငယ်ကစားသမား ၂ ယောက်ကိုလည်း ချီးကျူးသွားခဲ့ပါတယ်။

“  ကျွန်တော်တို့က ပွဲကိုကောင်းကောင်းစနိုင်ခဲ့တယ်၊ အခွင့်အရေးတွေလဲဖန်တီးနိုင်ခဲ့ပေမယ့် ပထမပိုင်းမှာသူတို့ပိုကောင်းခဲ့ပါတယ်၊   ကျွန်တော်တို့က ကိုယ်လုပ်နိုင်တယ်လို့ယုံကြည်တဲ့အတိုင်းနေရာလွတ်အချို့ကိုတော့ဖန်တီးနိုင်ခဲ့ပါတယ်။   ဒုတိယပိုင်းမှာတော့ ကျွန်တော်တို့က လွှမ်းမိုးနိုင်ခဲ့ပါတယ်။  သူတို့ဖက်က မာတင်နယ်လီနဲ့ ဆာကာတို့ကတော့ တကယ်ကို အပြင်းအထန်ကြိုးစားကစားကြတဲ့သူတွေပါပဲ  “  လို့ ပွဲ အပြီးမှာ မှတ်ချက်ပေးသွားခဲ့ပါတယ်။

လီဝန်ဒေါစကီးသတင်းတွေပြန်လည် လှုပ်ခတ်လာ

ဘိုင်ယန်မြူးနစ်အသင်းဖက်က စာချုပ်သစ်အတွက် ကမ်းလှမ်းမှုမရှိသေးဘူးလို့   လီဝန်ဒေါစကီးရဲ့ အေးဂျင့်က ထုတ်ပြောလာတာကြောင့် အာဆင်နယ်အသင်းနဲ့သတင်းတွေက ပြန်လည်လှုပ်ခတ်လာပါတယ်။ လီဝန်ကို  အာဆင်နယ်အသင်းက စိတ်ဝင်စားနေကြောင်း Four Four Two က ရေးသားထားခဲ့သလို  မန်ချက်စတာယူနိုက်တက်က စိတ်ဝင်စားနေတယ်လို့ Fichajes  က ရေးသားခဲ့တာပါ။

လူကာဂျိုဗစ်ကိုခေါ်ယူပါက  အိုဒီဂတ်တုန်းကလိုပဲ အကျိုးများနိုင်တယ်လို့ Football London သုံးသပ်လာ

ရီးရဲမက်ဒရစ်မှာ နေရာမရဖြစ်နေတဲ့ တိုက်စစ်မှုးလူကာဂျိုဗစ်ကို ခေါ်ယူပါက အိုဒီဂတ်တုန်းကလိုပဲ​ အကျိုးအမြတ်များစွာရရှိနိုင်မယ်လို့ Football London ကသုံးသပ်ဖော်ပြလာပါတယ်။  ဆာဘီယားသားအတွက် အာဆင်နယ်အသင်းက ကြိုးပမ်းခဲ့တယ်လို့ သတင်းတွေထွက်လာခဲ့ပေမယ့် လက်တွေ့တော့ခရီးမရောက်ခဲ့တာဖြစ်ပါတယ်။ ဒါ့အပြင်  အာဆင်နယ်တို့ဟာ ရီးရဲမက်ဒရစ်ရဲ့ ဟာဇက်ကို ကြိုးပမ်းနေတယ်ဆိုတဲ့ ကောလာဟာလအချို့လဲထွက်ပေါ်လာပါတယ်။

အိုဒီဂတ်ရဲ့ ကန်သွင်းချက်ကို နှမျောတသဖြစ်နေတဲ့ အီယန်ရိုက်

လာကာဇက်ရဲ့ ကြိုးစားအားထုတ်မှုကနေရရှိလာတဲ့ ဂိုးသွင်းခွင့်ကို လွဲချော်ခဲ့တဲ့အပေါ်မှာ  အီယန်ရိုက်က အခုလိုပဲမှတ်ချက်ပေးလာခဲ့ပါတယ်။  “ လာကာဇက် က အခွင့်ကောင်းကိုဖန်တီးပေးခဲ့တာပါ။ အိုဒီဂတ်က အခုထက်ပိုကောင်းအောင်လုပ်နိုင်ခဲ့သင့်ပါတယ်။  ဒါပေမယ့် သူကအခွင့်ကောင်းကို ဖြုန်းတီးမိခဲ့ပါတယ်။ သိပ်ကောင်းတဲ့ကန်ချက်ကို ကာကွယ်သွားတဲ့အပေါ် ချီးကျူးရမှာဖြစ်ပေမယ့်  ဂိုးသင့်တဲ့ အလုံးဆိုတာကိုလဲ သိထားရပါလိမ့်မယ်။  ဒီကန်ချက်က ဝင်သွားသင့်ပါတယ် ​“ လို့ပြောဆိုလာတာဖြစ်ပါတယ်။