နံနက်ခင်း ချဲလ်ဆီး သတင်းမှတ်စု (14Feb)

အလွန်အကျူးအောင်ပွဲခံလို့ ဝေဖန်ခံရတဲ့ချဲလ်ဆီး

ချဲလ်ဆီးကစားသမားဟောင်းလဲဖြစ်  ESPN ရဲ့တင်ဆက်သူလည်းဖြစ်တဲ့   ခရေ့ဂျ်ဘာလေက  Club World Cup ရရှိတဲ့အပေါ်ချဲလ်ဆီးကစားသမားတွေရဲ့အောင်ပွဲခံမှုကို ဝေဖန်သွားခဲ့ပါတယ်။

“ သူတို့ကြည့်ရတာ  ကမ္ဘာ့ဖလားရတာကျနေတာပဲဗျာ .. တကယ့်ပြသနာက မန်စီးတီးနောက်မှာ ၁၆ မှတ်ပြတ်နေတယ် .. ဒါကမှတကယ့်ကိစ္စဗျ .. ကျွန်တော်သာဆို ဒီဖလားလောက်ရဖို့အတွက် သန်း ၁၀၀ တန်တိုက်စစ်မှုးဝယ်မနေပါဘူးဗျာ  “ ဆိုပြီးအသင်းဟောင်းကိုဝေဖန်သွားခဲ့တာဖြစ်ပါတယ်။

အန်ကန်ကူကို စိတ်ဝင်စားနေတဲ့ ချဲလ်ဆီး

စပိန်သတင်းစာ Fichajes ရဲ့ဖော်ပြချက်အရ ချဲလ်ဆီးအသင်းဟာ   လိုက်ဇစ်တိုက်စစ်မှုး အန်ကန်ကူကိုစိတ်ဝင်စားနေတယ်လို့ သိရပါတယ်။  အသင်းရဲ့အင်အားနဲနေတဲ့တိုက်စစ်ကို အင်အားဖြည့်ဖို့အတွက် ကစားသမားရှာဖွေနေတဲ့တူချယ်ဟာ  ၂၄ နှစ်သားကိုအကြိုက်တွေ့နေတာဖြစ်ပြီး ၊ ကစားသမားကလည်း တိုက်စစ်မှာနေရာစုံကစားနိုင်သူဖြစ်ပါတယ်။ အန်ကန်ကူဟာ  ဒီရာသီမှာ  ၃၁ ပွဲကစားပြီး ၃၅ ဂိုးထိသွင်းယူထားနိုင်သူလည်းဖြစ်ပါတယ်။

ဘရိုဂျာကိုပစ်မှတ်ထားလာတဲ့ အာဆင်နယ်

စိန့်အသင်းမှာ အငှားသွားရောက်ကစားနေတဲ့  ချဲလ်ဆီးတိုက်စစ်မှုးအာမန်ဒိုဘရိုဂျာကို အာဆင်နယ်အသင်းက သူတို့ရဲ့ နွေရာသီတိုက်စစ်ပစ်မှတ်ထဲမှာ ထည့်သွင်းထားတယ်လို့ Football London ကဖော်ပြလာပါတယ်။ ဘရိုဂျာကို လိုချင်နေတဲ့အသင်းတွေအများကြီးရှိနေပြီဖြစ်ကြောင်းလဲသတင်းများကရေးသားနေကြပါတယ်။

ပြီးခဲ့တဲ့လ သတင်းစာရှင်းလင်းပွဲတွေမှာတော့ တူချယ်က ဘရိုဂျာဟာတိုးတက်လာနေကြောင်း ၊ လက်ရှိအချိန်ဟာ နွေရာသီအတွက်ဆွေးနွေးရမယ့်အချိန်မဟုတ်သေးကြောင်းတုန့်ပြန်ပြောဆိုဖူးပါတယ်။

အသင်းမပြောင်းဖြစ်တာမှန်တယ်လို့ ပြောလာတဲ့ အိုဒွိုင်း

လူငယ်တောင်ပံကစားသမား ဟတ်ဆန်အိုဒွိုင်းက ချဲလ်ဆီးအသင်းမှာ ကစားရတာပျော်ရွင်ကြောင်းနဲ့ နွေရာသီတုန်းက အသင်းမပြောင်းဖြစ်တာမှန်ကန်ခဲ့ကြောင်းကို အခုလိုပြောဆိုသွားခဲ့ပါတယ်။

“ နွေရာသီတုန်းကသာ အသင်းကနေထွက်သွားခဲ့ရင် အခုလိုမျိုး ကစားဖို့တွေ ၊ ဖလားတွေရနေဖို့တွေမှန်းလို့ရမှာမဟုတ်ပါဘူး..  ကျွန်တော် တော်တော်လေးပျော်ရွင်နေပါတယ်  ..  ဒီမှာဆက်နေဖြစ်ခဲ့လို့ အခုလိုအခွင့်အရေးတွေရနေတာပါ “  ဆိုပြီးပြောဆိုသွားခဲ့တာပါ။

တူချယ်ကို ငွေထုတ်ပေးမယ့် ချဲလ်ဆီး

ချဲလ်ဆီးအသင်းဟာ ဆောင်းရာသီမှာ လူခေါ်ဖို့အတင်းမတိုက်တွန်းခဲ့တဲ့အတွက် တူချယ်ကိုသဘောကျနေပြီး လာမယ့်နွေမှာ လိုအပ်တဲ့ပံ့ပိုးမှုတွေပြုလုပ်ပေးသွားမှာဖြစ်တယ်လို့ The Telegraph က ဖော်ပြသွားပါတယ်။  တူချယ်အတွက်အလိုအပ်ဆုံးက နောက်ခံ နဲ့ကွင်းလယ်လူဖြစ်နေပြီး လက်ရှိအချိန်မှာ ကွန်ဒီ ၊ ရိုက်စ်နဲ့ ချူမန်နီကတို့ကို လျာထားတယ်လို့သိရပါတယ်။